時間跳過去（上）
每個人都知道，人生大部份嘅痛苦都會過去。
但痛苦嘅moment，依然令人難受。
兩個月後，我就要面臨殘酷嘅公開試。
我嘅成績一向係中上，大概勉強入到U咁，但父母好緊張我嘅成績，好似奢望我突然爆發小宇宙，入到最頂尖嘅大學咁。
於是，父母日日將我困喺屋企溫書，連我部手機都沒收埋，下下要我拎住本書，我真係悶到生不如死。
如果呢兩個月一眨眼就過咗，咁就好啦！
今日我要返學校練Speaking，屋企去到學校呢條路，我已經行咗無數次。
路上冇啦啦多咗一間舖頭，我就行入去睇吓。
「歡迎光臨『煩惱小店』，小妹妹，你有咩煩惱啊？」一個黑衣女人坐喺櫃台度問。
佢把聲幾溫柔，我下意識就講出我嘅煩惱，反正又唔係咩秘密：「呢排成日要溫書，好辛苦啊。最好skip咗佢，一合埋眼就考完公開試。」
黑衣女人遞咗一隻錶畀我：「呢隻錶叫『跳過去』，只要你轉一轉個指針，就可以跳過你厭惡嘅時間。」
「錶？我冇錢喎。」我下意識答。
黑衣女人微笑：「哦，唔收錢住，下次先。」
咁好？我半信半疑咁戴起咗隻錶，轉一轉個指針。
我眼前一黑，再睜開眼嗰陣，我已經企喺考場外。
「詩詩，我哋終於考完最後一科啦！你想去邊度玩？」我嘅同學問。
我呆咗：「吓，考完啦？」
同學問：「梗係啦，我哋啱啱考完經濟，咪最後一科囉，你仲有其他選修科咩？」
「冇……」我一邊搖頭，一邊拎出手機，係2021年5月16日，距離我返學校練Speaking嗰日，已經過咗成三個月。
我渾渾噩噩咁返到屋企，父母預備咗大餐畀我，仲好寬容咁叫我打吓機、多啲同朋友出去玩。
我跳過咗痛苦嘅溫書時間，當然好開心，但心底都有一絲擔心。
所有嘅考試時間我都用隻錶跳過咗，我唔知考咗啲咩，更加唔知「自己」考成點，萬一「我」交晒白卷，咁咪死梗？
我旁敲側擊咁向身邊嘅人打聽，知道我呢三個月嘅行為舉止都好正常，但依然有啲不安。
一直去到放榜嗰日，我先放下心頭大石。
我嘅成績如我之前所料，就係勉強入到大學，亦冇咩驚喜。
雖然父母有啲失望，但都冇太大不滿。
即係話，用隻錶跳過去嘅時間，我係會正常生活，表現上雖然唔會有咩驚喜，但似乎都唔會有咩差錯。
咁我就可以放心用錶啦，可以想像，有咗呢隻錶，我嘅人生唔會再有任何痛苦！
自此之後，我長期戴住呢隻錶，一有咩唔順心，我就轉一轉個指針。
排隊等位、夜晚瞓唔著、俾父母鬧、同麻煩嘅三姑六婆食飯……一切我厭惡嘅時光，都被「跳過去」。
我雖然唔可以控制「跳過去」嘅時間長度，但我發現隻錶好有智能，每次「跳過去」，都啱啱好跳過我厭惡嘅時間。
入咗U之後，每次上堂我都「跳過去」，以一個中中等等嘅成績畢業。
畢業後搵工好辛苦，send咗好多份CV，去咗幾次面試都冇回應。
我嘅心情好煩躁，我下意識轉一轉個指針。
下一秒，我已經坐喺Office度返緊工。
我查一查，呢份工嘅人工都係中等，同我之前嘅預計差唔多。
我本來仲想了解吓工作內容，但轉念一想，我每日都會將返工時間「跳過去」㗎啦，我根本唔駛落手做嘢，駛乜了解啫？
於是，我再轉一轉隻錶，我已經放咗工，同朋友食緊飯。
哈哈，個個返工都係鍾意出糧啫；有得揀，邊個鍾意留喺公司做奴隸？
份工做咗大半年，我就俾公司炒咗。
原因？我都唔太清楚，所有返工時間我都跳過咗。
返到屋企，同父母講起呢件事，佢哋囉囉嗦嗦，話我做嘢唔認真……咁梗係「跳過去」啦！
失業嘅日子都被跳過，我好快又有下一份工。
下集：https://bit.ly/39wzyJt
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #時間跳過去
Search